Birlashgan Millatlar Tashkiloti Qo‘shma Muvofiqlashtiruvchi Kengashining yig‘ilish bo‘lib o‘tdi

Joriy yilning 13 iyul' kuni Iqtisodiy taraqqiyot va kambag‘allikni qisqartirish vazirligi Birlashgan Millatlar Tashkiloti vakillari bilan hamkorlikda 2021-2025 yillarga mo‘ljallangan BMTning barqaror rivojlanish bo‘yicha hamkorlik yuzasidan Doiraviy dasturni amalga oshirish bo‘yicha Qo‘shma Muvofiqlashtiruvchi Kengashning 1-yig‘ilishini tashkil etildi.

Yig‘ilishda Iqtisodiy taraqqiyot va kambag‘allikni qisqartirish vazirining birinchi o‘rinbosari Ilhom Norqulov, vazirlik departament direktorlari Ilhom Mamatkulov va Miryusup Umarov, tegishli vazirlik va idoralar rahbarlari, shuningdek, BMT, BMTTD, YuNISEF, Yaponiya elchixonasi va boshqa O‘zbekistondagi xalqaro tashkilotlar va diplomatik konsulliklar vakillari ishtirok etishdi.

Ushbu yig‘ilishda ko‘tarilgan asosiy masalalar BMT va O‘zbekiston o‘rtasidagi 2020 yilga mo‘ljallangan hamkorligining asosiy natijalarini muhokama qilish, BMT jamoasining 2021-2022 yillarga rejalashtirilgan natijalarini muvofiqlashtirish va tegishli Qo‘shma ish rejalarini tasdiqlash masalalari bo‘ldi. Bundan tashqari, yig‘ilish davomida hamkorlik Doirasining taklif etilgan boshqaruv tuzilmasi ko‘rib chiqildi va tasdiqlandi, shuningdek, 2021-2025 yillarga mo‘ljallangan hamkorlik Doirasining uzoq muddatli moliyalashtirish asoslari ko‘rib chiqildi.

Ta'kidlash joizki, yig‘ilishda Iqtisodiy taraqqiyot va kambag‘allikni qisqartirish vazirining birinchi o‘rinbosari Ilhom Norqulov so‘zga chiqdi. O‘z ma'ruzasida pandemiyadan keyingi davrda respublikaning ijtimoiy-iqtisodiy tiklanishini tezlashtirishda BMTning yetakchi rolini alohida ta'kidlab o‘tdi. Bundan tashqari, BMTning jahon amaliyoti va innovasion ishlanmalari asosida inson kapitalini oshirish, kambag‘allikni qisqartirish strategiyasini amalga oshirish kabi masalalar va boshqa sohalarda yanada hamkorlik qilishga kelishib olindi.

Ushbu yig‘ilishda xalqaro tashkilotlar vakillari, xususan, Xelena Freyzer (BMTning O‘zbekistondagi doimiy koordinatori), Matilda Dimovska (BMTTD O‘zbekistondagi doimiy vakili), Munir Mammadzade (Yunisefning O‘zbekistondagi doimiy vakili) ham so‘zga chiqishdi. O‘z nutqi davomida ishtirokchilarning har biri Birlashgan Millatlar Tashkilotining strategik ustuvor yo‘nalishlari va 2021-2025 yillarga mo‘ljallangan yakuniy natijalar hamda ko‘p yillik moliyalashtirish asoslarini taqdim etdilar.

Yig‘ilish natijasida hamkorlik asoslari dasturini amalga oshirishda samarali yutuqlarga erishishni nazarda tutuvchi bir qator konseptual hujjatlar tasdiqlandi. Xususan, hukumat tomonidan muvofiqlashtiruvchi kengash tarkibi, BMT jamoasining ish rejalari, shuningdek, ishchi va texnik guruhlar tarkibini tasdiqlash masalalari ko‘rib chiqildi.