Helena Freyzerning “2017-2020 yillarda O’zbekiston va Birlashgan millatlar tashkiloti o’rtasidagi hamkorlikni yanada mustahkamlashga yo’naltirilgan Yo’l xaritasi” imzolanishi bo’yicha bayonoti

“Yo’l xaritasini” imzolash orqali O’zbekiston Respublikasi hukumati va Birlashgan millatlar tashkiloti mamlakat fuqarolari, xususan, ijtimoiy himoyaga muhtoj qatlam uchun taraqqiyot sari yo’l ochish, farovonlikni ta’minlash bo’yicha hamkorlikni davom ettirib, istiqbolli maqsadlar yo’lida birgalikda harakat qilishga kelishib oldilar.

“Yo’l xaritasi” O’zbekistonning 2017-2021 yillarga mo’ljallangan Harakatlar strategiyasi, Milliy barqaror rivojlanish maqsadlari loyihasi va 2016-2020 yillarga mo’ljallangan BMT Taraqqiyotga ko’maklashish bo’yicha dasturi (UNDAF) loyihasidan kelib chiqqan holda erishish reja qilingan yuzdan ortiq strategik ustuvorliklarni belgilab beradi hamda hukumatning Barqaror rivojlanish maqsadlari ijrosini ta’minlash, BMTning inson huquqlari bo’yicha bir qator hujjatlari ostidagi majburiyatlarini bajarish zaruriyatini o’rtaga chiqaradi.

“Yo’l xaritasi” bandlarini amalga oshirishda BMT tomonidan taqdim etiladigan ko’mak iqtisodiy, inson qimmatini oshirishga xizmat qiluvchi, samarali boshqaruvni tashkil etishda qo’l keluvchi, tajriba va dalillarga asoslangan holda siyosat yuritishga ko’maklashuvchi, ijtimoiy va atrof-muhitni muhofaza qilishda yengillik yaratuvchi, ta’lim va sog’liqni saqlash, madaniy meroslarni asrab avaylashga xizmat qiluvchi, bolalar va ayollar huquqlarini himoya qilishga zamin yaratuvchi yordamlarni o’z ichiga oladi. Bundan tashqari, tashkilot tinchlik va barqarorlikni ta’minlash, tabiiy ofatlar xavfini kamaytirish borasida ham O’zbekistonga ko’maklashadi.

“Yo’l xaritasi” hukumat va BMTning barqaror rivojlanish bo’yicha hamkorligi rivojiga hissa qo’shadi. Biz qabul qilingan hujjatni hukumat uchun ham, BMT uchun ham mas’uliyat yuklovchi, Harakatlar strategiyasi va BRMlarni amalga oshirish jarayonini keyingi bosqichga olib chiquvchi, mamlakat aholisi farovonligini ta’minlashda xizmat qiluvchi muhim vosita sifatida ko’ramiz”, dedi Helena Freyzer.

Birlashgan millatlar tashkilotining O’zbekistondagi vakolatxonasi, BMTning global va mintaqaviy darajalarda faoliyat ko'rsatayotgan agentliklari bilan birgalikda ushbu “Yo’l xaritasi” bandlarini amalga oshirishda O’zbekiston hukumati bilan hamkorlik qilish va qo’llab-quvvatlashga tayyor. Buning uchun targ’ibot-tashviqot ishlari olib borilib, homiylar va boshqa hamkor tashkilotlarni jalb qilishga, barcha zarur resurslarni uning ijrosiga yo’naltirishga alohida e’tibor qaratiladi.