Imkoniyati cheklangan insonlarni eshita olishimiz lozim

Xalqaro imkoniyati cheklangan insonlar kunida 100 ga yaqin ishtirokchilar, shu jumladan, ota-onalar, yoshlar, hukumat vakillari, nogironlik tashkilotlari va BMT agentliklari siyosiy, ijtimoiy, iqtisodiy va madaniy hayotda imkoniyati cheklangan insonlarning huquqlari va farovonligini har tomonlama ta'minlash uchun yig'ildilar.

BMTning O'zbekistondagi jamoasi "Ilhom" teatrida Activation 2.0 Forumini tashkil etdi. Tadbirda turli xil kelib chiqishga mansub imkoniyati cheklangan insonlar o'zlari duch keladigan muammolar va ularni qanday yengib o'tganliklari haqida gapirib berdilar. Ularning ta'kidlashicha, xilma-xillikni ta'minlash imkoniyati cheklangan insonlarga o'z mavjud qobiliyatlarini to'liq ishga solish uchun yordam beradi.

"Ushbu holat har yerda bor. Shunga qaramay, butun dunyo bo’ylab bir milliard atrofidagi imkoniyati cheklangan insonlarning juda ko'p qismi ko'zdan yashiringan bo'lib, ularning ehtiyojlari va tashvishlariga e'tibor berilmaydi, ularning hissiyotlari hech kimni qiziqtirmaydi, ularning ish samaradorligidan unumli foydalanilmaydi", dedi BMTning O'zbekistondagi doimiy vakili Helena Freyzer. Uning so'zlariga ko'ra, BMT nogironlik tashkilotlari va hukumat bilan imkoniyati cheklangan insonlar uchun yangi qonun loyihasini ishlab chiqmoqda.

"Ilhom" teatri zalida Activation 2.0 forumidan oldin "Biz birgamiz" deb nomlangan ko'rgazma o’z ish faoliyatini boshladi. Bu qaror qabul qiluvchilar va xalqaro hamjamiyat uchun imkoniyati cheklangan insonlar hayotiga nazar solishga imkon beradi. Ucell telekom operatori muhim xabarlarni tez va sifatli tarzda yetkazishga yordam berish uchun ko'rgazmaning multimedia qismini qo'llab-quvvatlamoqda.

"Imkoniyati cheklangan bolalar boshqa bolalarga qaraganda mehribonlik uylariga joylashtirilishi va oilasidan ajralib qolish ehtimoli taxminan 74 baravar ko'p", deydi UNICEFning O'zbekistondagi vakili o'rinbosari Afshin Parsi. Uning so'zlariga ko'ra, imkoniyati cheklangan bolalarning ahvolini yaxshilash uchun vaziyatni chuqur tahlil qilish zarur.

3 dekabr - Xalqaro imkoniyati cheklangan insonlar kuni har yili ularning huquqlari va farovonligini jamiyat va taraqqiyotning barcha sohalarida targ'ib qilish orqali nishonlanadi. 2018 yilda kunning asosiy shiori "Imkoniyati cheklangan insonlarning imkoniyatlarini kengaytirish hamda hamkorlik va tenglikni ta'minlash" bo’ldi. Bu dastur imkoniyati cheklangan insonlarning teng va barqaror rivojlanish imkoniyatlarini kengaytirishga qaratilgan.

Hozirda 177 mamlakat BMTning Imkoniyati cheklangan insonlar huquqlari to'g'risidagi Konvensiyasini ratifikatsiya qilgan. O'zbekiston Konvensiyani imzolagan bo'lsa-da, uni ratifikatsiya qilish orqali imkoniyati cheklangan insonlar bilan bog'liq masalalarni har tomonlama hal qilinishini ta'minlashi mumkin.